თუკი ვინმე მკითხავს, რა არის ჩემი საუკეთესო უნარი, უდავოდ ვუპასუხებ – ახალი კავშირების დამყარება. ეს თანდაყოლილი უნარია, რომელიც ყველა სფეროში, სადაც კი ვყოფილვარ, გამომადგა – დაწყებული საერთაშორისო ურთიერთობებით, დამთავრებული ანტრეპრენერობით. სწორედ ამ უნარმა მომიტანა მრავალი შესაძლებლობა და ითამაშა გადამწყვეტი როლი ჩემს კარიერულ განვითარებაში.
სტუდენტობიდანვე არასდროს ვერიდებოდი ნებისმიერი რანგის პირთან, პრეზიდენტი, ელჩი, მინისტრი თუ ადამიანი, რომელმაც კომპანია 500 მილიონად იყიდა, გასაუბრებას, მისალმებასა და ხელის ჩამორთმევას. ჩემს თავში ყოველთვის ვიმეორებდი: „ისინიც ჩვეულებრივი ადამიანები არიან და ერთ დროს ჩემნაირი სტუდენტები თუ დამწყები პროფესიონალები იყვნენ.“
სამყაროში, სადაც კონკურენცია დღითიდღე იზრდება და სამუშაო ბაზარი მუდმივად იცვლება, ნეთვორქინგი წარმატების ერთ-ერთი ყველაზე მნიშვნელოვანი ფაქტორია. განსაკუთრებით სტუდენტებისთვის, რომლებიც პროფესიულ სამყაროში პირველ ნაბიჯებს დგამენ, სწორი კავშირების დამყარება შესაძლოა კარიერის აღმავლობის დასაწყისი გახდეს.
ამ ბლოგში გაგიზიარებთ ჩემს გამოცდილებას, პრაქტიკულ რჩევებსა და ინსტრუმენტებს, რომლებიც დაგეხმარებათ ნეთვორქინგის უნარების განვითარებაში და კარიერული შესაძლებლობების გაღრმავებაში.
რატომ არის ნეთვორქინგი მნიშვნელოვანი?
ბევრი სტუდენტი ფიქრობს, რომ წარმატების მისაღწევად საკმარისია მხოლოდ კარგი განათლება და CV, მაგრამ სინამდვილეში, კავშირები ისეთივე მნიშვნელოვანია, როგორც ცოდნა. ნეთვორქინგის საშუალებით შეგიძლიათ:
- მოიპოვოთ ახალი შესაძლებლობები;
- გაიგოთ მეტი იმ ინდუსტრიის შესახებ, რომელიც გაინტერესებთ;
- მიიღოთ კარიერული რჩევები გამოცდილ პროფესიონალებისგან;
- იპოვოთ მენტორები და პარტნიორები მომავალი პროექტებისთვის.
განსაკუთრებით ანტრეპრენერულ გზაზე, ხშირად ყოფილა შემთხვევა, როდესაც სრულიად შემთხვევით უცნობ ადამიანებს დახმარების ხელი გამოუწვდენიათ. ეს განსაკუთრებით ხდება მაშინ, როდესაც ხედავენ შენში, რომ ქმნი რაღაც ღირებულს და ამაში მთელ შრომას და მონდომებას დებ. ნამდვილი ნეთვორქინგი არა მხოლოდ კონტაქტების რაოდენობაა, არამედ ურთიერთობების ღირებულებაც, რაც კარიერულ განვითარებაში გადამწყვეტ როლს ასრულებს.
როგორ დავიწყოთ ნეთვორქინგი?
- გაიცანით მეტი ხალხი – ნებისმიერ ადგილას, იქნება ეს უნივერსიტეტი, ღონისძიება თუ ონლაინ სივრცე, გამოიყენეთ შანსი, რომ გაესაუბროთ ახალ ადამიანებს.
- იყავით აქტიური LinkedIn-ზე – ეს არის პლატფორმა, სადაც შეგიძლიათ დაამყაროთ პროფესიული კავშირები, მოიძიოთ სამუშაოები და დაეკონტაქტოთ საინტერესო პირებს. შექმენით სრულყოფილი პროფილი, აღწერეთ თქვენი უნარები და გამოცდილება, და რეგულარულად გააზიარეთ თქვენი ხედვები.
- დაესწარით ღონისძიებებს და კონფერენციებს – მსგავსი ადგილები საუკეთესოა პროფესიული კავშირების დასამყარებლად. ნუ შეგეშინდებათ საუბრის დაწყების, დამსწრეები ხშირად მზად არიან ახალი კონტაქტებისთვის.
ერთ ამბავს მოგიყვებით, 2020 წელს, ერთ-ერთ კონფერენციაზე მოვხვდი, მაშინ მე და ჩემს ძმას და თანადამფუძნებელს სტარტაპი Biliki App გვქონდა, რომელიც მობილური გიდი იყო, სადაც მომხმარებელს შეეძლო ციფრული ტურები განეთავსებინა და გაეყიდა. ამ კონფერენციაზე, სრულიად შემთხვევით, ერთ შვეიცარიელ ქალბატონს შევხვდი, რომლის სახელიც არაფერს მეუბნებოდა, თუმცა როგორც შემდეგ აღმოჩნდა, ეს ქალბატონი, ევროპის ტოპ 50 ქალ მეწარმეს შორის იყო შესული, ასევე იყო მენტორი და ინვესტორი. მასთან, 10 წუთი ვისაუბრე, და იმდენად მოეწონა ჩვენი იდეა, რომ რამდენიმე თვეში თავად დამიკავშირდა და ჩვენი მენტორი გახდა.
ამ ამბავის მორალი ის არის, რომ რა დროც არ უნდა გავიდეს, ვისაც არ უნდა შეხვდეთ, ადრე თუ გვიან ის შეიძლება თქვენი კარგი მეგობარი, მრჩეველი, ინვესტორი ან კარიერის გზაზე წარმატების მომტანი გახდეს.
ამიტომ, თუკი მოგერიდებათ ვინმეს გაცნობა, ღრმად ჩაისუნთქეთ და უბრალოდ მიესალმეთ, დანარჩენი უკვე გაცილებით მარტივადაა.
- გახდით სტუდენტური ორგანიზაციების წევრი – უნივერსიტეტში მონაწილეობა სხვადასხვა აქტივობებში არა მხოლოდ ახალ ადამიანებთან დაგაკავშირებთ, არამედ გუნდური მუშაობის, კომუნიკაციისა და ლიდერობის უნარების განვითარებაშიაც დაგეხმარებათ.
როგორც უკვე აღვნიშნე, ჩემი პროფესიული მიმართულება საერთაშორისო ურთიერთობებს მოიცავდა, სადაც სწავლისა და მუშაობის პარალელურად აქტიურად ვიყავი ჩართული სტუდენტურ ღონისძიებებში. ხშირად ვმონაწილეობდი ისეთ აქტივობებში, როგორიცაა გაეროს მოდელირება, ევროპის ახალგაზრდული პარლამენტი და სხვა მსგავსი პროექტები. ამ გამოცდილებამ მნიშვნელოვნად გამიუმჯობესა მოლაპარაკებების წარმოების, საჯარო გამოსვლების და ახალი კავშირების დამყარების უნარები, რამაც ჩემს კარიერულ განვითარებაში დამეხმარა.
- გამოიყენეთ Herio App – სტუდენტობის დროს ეს აპლიკაცია რომ მქონოდა ჩემი კარიერა ალბათ კიდევ უფრო მეტად წარმატებული გამოდგებოდა. თუმცა ახალ თაობას ნამდვილად გაუმართლა. ეს არის აპლიკაცია, რომელიც გაძლევთ შესაძლებლობას, იპოვოთ როგორც დისტანციური, ისე ადგილზე შესასრულებელი სამუშაოები. ასევე, შეგიძლიათ დაამყაროთ კონტაქტები დამსაქმებლებთან და სხვა პროფესიონალებთან. აპლიკაცია გარკვეულწილად არის upwork-ის და Fiverr-ის ალტერნატივა საქართველოში. აპლიკაცია ხელმისაწვდომია, როგორც აიოეს (IOS), ასევე ანდროიდ (Android) მომხმარებლებისთვის.
როგორ დავძლიოთ ნერვიულობა და თვითრწმენის ნაკლებობა?
ბევრი ადამიანი თავს უხერხულად გრძნობს ახალი ხალხის გაცნობისას, განსაკუთრებით, როდესაც საქმე პროფესიულ კომუნიკაციას ეხება. თუ ნერვიულობთ, გაითვალისწინეთ ეს რჩევები:
- დაიწყეთ მცირე საუბრებით – არ არის აუცილებელი, რომ პირველივე საუბარში კარიერულ გეგმებზე ილაპარაკოთ. უბრალო შეკითხვები, მაგალითად „რას საქმიანობთ?“ ან „როგორ მოხვდით ამ სფეროში?“ საკმარისი იქნება საუბრის გასახსნელად.
- იყავით ნამდვილი – არ არის საჭირო ზედმეტად ოფიციალური და დაძაბული იყოთ. ბუნებრივობა და გულწრფელობა ყოველთვის მუშაობს. ეს თუ დაძაბულობას მოგიხსნით, ხელში ფინჯანი ჩაი, ყავა ან წყალი დაიკავეთ, რომ პერიოდულად ყურადღება გადაიტანოთ.
- “დაარტყით” მათ ეგოს – ადამიანებს უყვართ როდესაც რჩევას ეკითხებიან, არ მოგერიდოთ რჩევის კითხვის, მნიშვნელობა არ აქვს, ეს სწავლას, კარიერულ ზრდას თუ სტარტაპის შექმნას ეხება. ხშირად, სწორედ ასეთი საუბრები შეიძლება ძლიერი და ღირებული ურთიერთობების საფუძვლად იქცეს.
- მოამზადეთ მოკლე შესავალი საკუთარი თავის შესახებ – ე.წ. „Elevator Pitch“, სადაც 30 წამში შეძლებთ საკუთარი უნარებისა და გამოცდილების მოკლედ და საინტერესოდ გადმოცემას.
- გაითვალისწინეთ, რომ უმეტესობა ხალხი გახსნილია კომუნიკაციისთვის – თუ თქვენთან საუბარი არ მოინდომეს, ეს პირადად არ მიიღოთ. ეცადეთ სხვებთან სცადოთ კომუნიკაცია.
როგორ შევინარჩუნოთ კონტაქტები?
ნეთვორქინგი მხოლოდ გაცნობით არ სრულდება, მთავარია, რომ კონტაქტები სწორად შეინარჩუნოთ:
- გაუგზავნეთ LinkedIn-ზე დაკავშირების მოთხოვნა, მიწერისას მიუთითეთ, სად და როგორ გაიცანით ეს ადამიანი;
- პერიოდულად გააგზავნეთ მოკლე შეტყობინება ან მოიკითხეთ რაიმე პროფესიული მიღწევის შემდეგ;
- თუ გაქვთ რაიმე ღირებული ინფორმაცია, რომლითაც ადამიანს დაეხმარებით, გაუზიარეთ ეს მას;
- დაესწარით ინდუსტრიულ ღონისძიებებს, სადაც ისევ შეხვდებით თქვენს კონტაქტებს.
დასკვნა
ნეთვორქინგი არის უნარი, რომელიც არამარტო კარიერულ განვითარებაში გეხმარებათ, არამედ გაძლევთ საშუალებას, გაიცნოთ საინტერესო ადამიანები, მიიღოთ ახალი შესაძლებლობები და მუდმივად განვითარდეთ. ნუ შეგეშინდებათ ახალი კონტაქტების დამყარების, რადგან ყველა პროფესიონალი ოდესღაც სტუდენტი იყო და ისინიც თქვენს სიტუაციაში ყოფილან.
კარგი ნეთვორქინგის საფუძველი თავად პროცესისგან სიამოვნების მიღებაა. პირადად ჩემთვის, ეს არამარტო ახალი შესაძლებლობების აღმოჩენის გზა, არამედ ენერგიისა და ბედნიერების ერთ-ერთი მთავარი წყაროა.
ასე რომ, ჩაერთეთ ნეთვორქინგში, სცადეთ ახალი პლატფორმები, დაესწარით შეხვედრებს და გახდით პროფესიული საზოგადოების ნაწილი, რადგან ცხოვრებაში იმაზე ძვირფასს ვერ იპოვით ვიდრე - ადამიანი.
.png)
.png)
